午餐在家中吃咖哩蟹，吃到一半，我見到有隻很大的烏蠅飛過來，明顯也想吃蟹，我立即伸手一揮，用掌風掃開牠。
我母親見狀，以為我發神經搞事，不滿表示：「你做咩呀？」我回答：「做咩？有烏蠅呀！」
「哦。我頭先睇唔到嘛。」她明白過來。「唔好理佢啦。」
「唔好理佢？你唔理佢，佢就撞落盤蟹度啦喎？你係咪想同佢一齊食呀？」
「唔係。」母親繼續吃蟹。
「唔係，咁你又做咩阻止我去阻止佢飛過嚟呢？」我目瞪口呆。
「唔好搞咁多嘢啦。」
「一隻烏蠅，就睇到你哋藍絲嘅價值觀。」我按捺不住。「你自己睇唔到個問題，其他人睇到去行動，你就話人搞事。到你自己都明白係有啲問題啦，又想件事自己會停，會好，嫌人哋行動太過激進。總之乜都唔好理，唔好搞到自己……但隻烏蠅都仲喺度呀！有盤蟹喺度佢點會走？」
到餘下最後一隻蟹鉗，母親問我：「你食唔食？」
「你想唔想食？」
「我驚你飽。」
「我係問你，你自己想唔想食？你想食就老實講，我咪畀你。」
母親將蟹鉗一截分給我，說：「畀你。」
「唔需要。你想食可以食晒佢。」
於是母親就慢慢拆蟹來吃，而烏蠅圍住她的頭在轉。
「佢返嚟啦。」我提醒她。
「我知，我聽到。」母親無奈地說。
Search